Bergsträßer Anzeiger Plus-Artikel Mundartglosse Mønnem braucht Bier!

Die Dir fliegt uff im Vagissmøinnischt unn drinn schteht - ihr kännt’s eisch dängä - de Häbbädd inn volla Raasch. Vor gut zwee Wochä wa dess. Awwa isch vazehl‘s eisch heit, weil ma øm Schtømmdisch beim Wänna seitdämm vunn nix ønnaräm mehr gschprochä hawwä. Die Rädd iss vunn de Eischbaum-Pleidä, also Insolvänz. Fä uns, also de Ginnda, de Wänna, de Høina, de Häbbädd unn nadierlisch a fä misch, iss dess ä Kaddaschtroph vunn uvorschdellbarä Ausmaßä. Soga de Schorsch, de Pelza unn Schollä-Dringa, wo imma hinnä allä in de Egg hoggd, hodd Mitleid midd uns aldä Mønnema - unn bschdellt ausnøhmswei ä Ureisch. „Dass isch dess noch erlewä muss“, mähnt de Ginnda, „Mønnem ohnä Eischbaum - so wass gibt‘s doch ga nädd!“ Isch nuschl traurisch „ä Uuding iss dess“ vor misch hie. „Warum werrä mir so gschtrooft? Mir kännä doch nix däfir, dass die Jugänd kä Bier mehr drinkt!“, groint de Høina.

Mir gewwä uns wirklisch Mieh. Seit des raus iss middä Eischbaum, träffä ma uns jetzt nimmi ä mol die Woch beim Wänna, sunnern jeden Daag, außa møndaags, do hodda zu, unn dringä Ureisch, Pils, Weezä, Altgold, Helles, Reiwa- odda Kellabier, soviel ma hald noibringä. Dess iss jo aawa a kä Leesung fär dess Problääm. „Wønn‘ma uns die Grutz absaufä, iss de Eischbaum løngfristisch a nädd kholfä.“ Wo a Räschd hodd, de Ginnda... Ma sinnierä in Eigävawaldung iwwa Maarketing-Schtrategiä, neiä Mischgeträngä, die hipp wärrä kennda: än kurpelzisch-pelzischä Schørlä-Export-Radler, än Vorschlag vumm Schorsch, odda Dornkaat-Ureisch-Bowle - „nur echt midd Mønnema Friedhoswassa!“ Awwa dringä wollä ma sowas nadierlisch nädd. De Häbbädd hodd die Leesung: Mänätschmänt-„Buy out“ hodd jo nix gebrocht - wie wär‘s, wønn se die Firma øn ihr Kundä vakaafä? „Do heddä ma de Absatz kwasi in de Høond!“, sacht de Høina. „Isch weer däbei!“, saag isch - unn alle schdimmä oi: „Isch aa!“ Macht mit, ihr Leit mir dringä Bier fä Mønnem!

Ihne Ihrn Kall

Schreiben Sie mir: kall@mannheimer-morgen.deAlle Artikel vom Kall: mannheimer-morgen.de/kall

Mundartglosse alle Kolumnen von De Kall